Cuba, Jerangkong Urip Njumbul ring Banyuwangi
Antariksawan Jusuf (dipublikasikan pada Kamis, 06 April 2023 08:26 WIB)
- Laporan
Mara-mara cuba, jerangkong urip (zombie) lan wong hang marek diantemi/ditembak seliweran ring Ballroom Lantai 2 Hotel Santika Banyuwangi. Cumpu iku mung asile wong latihan dadi Tukang Paes pilem hang dianakaken telung dina sakat Senin (3/4).
Latihan hang judhule "Make up Film Spesialis" (Mafias Camp) iki digelar Kementerian Pariwisata dan Ekonomi Kreatif, dipiloni wong-wong seni lan pilem asal Banyuwangi, Jember, Solo, Bogor lan Jakarta.
Wong-wong iki wis diseleksi sedurunge teka karya senine arupa topeng, make up, narasi uga kereasi liyane hang dienggo ring pilem.
Miturut Ketua Pelaksana Mafias Camp, Frianty Kartika Widhi hang uga Wakil Ketua Tim Pokja Edukasi 1 Direktorat Kemenparekraf RI seleksi pesertane ana 80 wong. Kelawan cara njero kawat (daring), aju disaring dadi 50 lan dipilih maning mung 40 wong hang milu iwuh pelatihane.
Kepala Disbudpar Kabupaten Banyuwangi, M.Yanuar Bramudya, ngomong gok donya pilem ring Banyuwangi 10 taun seperene iki wis katon asile.
Bramuda ngomong kelawan tambahe kompetensi wong-wong pilem iki kualitas pileme saya dhuwur lan produksi pileme saya apik.
Ring iwuh iku uga diputer pilem produksi Banyuwangi hang judhule "Kahanan."
Dene Ketua Dewan Kesenian Blambangan Hasan Basri ngomong gok ide pelatihan iki dikawiti tepak marek kecaruk R. Arvin I Miracelova, SE, ketua Baliwood lan Jalur Sutera Film Nusantara (JSFN). Arvin aju dadi narasumber teka Mafias Camp bareng ambi Indah Rezeki Miracelova, Dr. Teddy Hendiawan, S.Ds, M.Sn, dhosen hang uga praktisi Universitas Multimedia Nusantara lan Wayan Subrata pelaku adat tradhisi teka Bali.
Materi hang diwulangaken ring Mafias Camp iki contone maes karakter lokal prosthethic. Engkone topeng lan paese arep dienggo dadi karakter lokal.
Mafias Camp iki uga dipiloni lalare difabel. Salah sijine yaiku Putri, tuna wicara hang dibantu penerjemah digital.
Iwuh Mafias Camp iki ditutup ring Alexander Reyaan, Direktur Pengembangan SDM Ekonomi Kreatif Kemenparekraf.
Alex ngomong gok iwuh iki minangka salah siji program kanggo nyokong program Indonesia Emas 2045. Salah siji tandhane yaiku 70% wong Indonesia dadi wong-wong kreatip.
(Aguk WN)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
