Ikawangi Lampung: Teka Mbecikaken Umah Sampek PrabuRara

Antariksawan Jusuf (dipublikasikan pada Selasa, 01 September 2020 07:25 WIB)
- Laporan



Rada arang-arang bakti sosial hang dilakoni paguyuban Ikatan Keluarga Banyuwangi (Ikawangi) kaya hang digawe ana ring propinsi Lampung: Mbecikaken Umah!
Ndeleng umahe salah siji wargane hang teka gedheg lan wis temiyung, Ikawangi Sumatera Grup (ISG) hang ana ring wilayah propinsi Lampung aju gancang ngersaya mbangun umahe Pak Paijan hang ana ring Natar, Lampung Selatan taun sore.
Setemene liyane mbecikaken umah wargane, ISG wilayah Lampung iki ya wis nganakaken baksos liyane.
Lampung iki mula dadi salah siji panggonan mboro wong Banyuwangi.
"Tepak kawitan diedegaken bain taun 2013, warga hang kedaptar ana 10.857. Iku bain setemene mung Lampung Selatan," jare Kang Khairil ketua ISG wilayah propinsi Lampung. "Saiki, kelawan melebune kabupaten liya, ana 13 kabupaten nong Lampung, mesthine ana atusan ewu keluwarga," jare Kang Iril celukane wong asal Pulo Merah hang megawe ring kebun sawit.
Sedurunge nggabung ring ISG, minangka payunge Ikawangi sak pulo Sumatera, Ikawangi Lampung wis jejeg. Wis nduwe idin, NPWP, kantor sekretariat lan kepengurusan dhewek taping merga ndeleng ISG nduwe visi, misi hang padha, Ikawangi Lampung pungkasane milu nggabung nang ISG kelawan sukarela Januari 2019.
Sangking akehe warga wong Banyuwangi nong propinsi Lampung, istilahe: "Teka keparat sampek aparat ana wong Banyuwangi."
Mula wong Banyuwangi akeh hang mboro ring Lampung. Malah wakil gubernur wadon kawitan hang saiki yaiku Chusnunia Chalim anake wong Banyuwangi hang ana ring Lampung yaiku Kiyai Mbah Salim. Ana maning dokter Kuswandi wong asal Tukangkayu hang duwe rumah sakit Bumi Waras hang karyawane akeh njuwut teka Banyuwangi. Aja takon akehe maning hang dadi wong tani, pulisi lan pegawe liyane. Bu Chusnunia lan dokter Kuswandi iki dadi penasihate Ikawangi Lampung pisan.
Jare Andi Kurniawan, ketua 1 Ikawangi wilayah Lampung, ana desa hang aran Karang Anom, wargane sak desa wong Banyuwangi kabeh. Aran pirang-pirangane desa "Banyuwangi" ya akeh merga hang mbukak desa iku wong Banyuwangi.
Dadi hing maido, kesenian Banyuwangi mekar lan merujuk ring Lampung.
"Kadhung janger, angklung, jaranan wis biyasah. Iki ana kesenian Prabu Rara hang nong Banyuwangi bain wis emeh hing ana," jare Andi, lare asal Temurejo.
ISG Lampung arep nyatheti maning warga Ikawangi sak propinsi, mesthine atusan ewu, jare Andi nutup omongane.


Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.


Sumber : Wawancara

Editor: Hani Z. Noor