Puisi Rumah Tak Bernyawa Juwara
NURHARIRI (dipublikasikan pada Selasa, 30 Mei 2023 08:32 WIB)
- Laporan
Ring Festival Sastra hang dianakaken Pemerintah Kabupaten Banyuwangi taun 2023, uga ana lomba nulis puisi lan cerita tingkat SMP/MTs sak Kabupaten Banyuwangi. Pengumumane disampekaken ring Taman Blambangan, Rabu (24/05/23).
Azzahra Anirmala Sekar Kedaton, murid MTsN 8 Kecamatan Genteng Banyuwangi asil dadi juwara paling apik ring acara iku kelawan judhul puisi "Rumah Tak Bernyawa."
Kepala MTsN 8 Banyuwangi Sri Endah Zulaikhatul Kharimah ngerasa mongkog ambi perestasi siswa kelas sanga iku.
"Masiya wektune hang mepet seru, Alhamdulillah muridisun bisa dadi hang paling apik ring lomba nulis puisi Bahasa Indonesia," jare Endah.
Kepala Kantor Kementerian Agama Kabupaten Banyuwangi Dr. Moh. Amak Burhanudin nguntabaken girange atine ring perestasi hang diasilaken murid maderasah iku.
Sakliyane teka MTsN 8 Banyuwangi, kanggo Pentigraf (Cerpen tiga parafraf) Bahasa Indonesia, Luna Veronika Purnomo dadi juwara nomer loro.
"Muga-muga perestasi lare maderasah iki bisa dadi inspirasi kanggo murid maderasah liyane," jare Amak.
Amak ngelem seru ring merujuke literasi lan sastera hang ana ring lingkungan Kantor Kementerian Agama Kabupaten Banyuwangi.
Ketua Komunitas Lentera Sastra, Syafaat, hang hadir ring anugerah para juwara ambi nonton siswi MTsN 1 Banyuwangi, Devi Fatihatul Asliha hang dadi juwara ring lomba maca puisi hang dianakaken ring Radar Banyuwangi sedurunge, uga mongkog ambi perestasine para murid.
"Para pembimbing ring maderasah iku uga dadi anggota Lentera Sastra hang aktip merujukaken literasi lan sastera," jare Syafaat dikancani sekretaris lan bendahara.
Guru Bahasa Arab MTsN 1 Nuhbatul Fakhiroh Maulidia, S.Pd dadi juri Cipta lan maca puisi Using tingkat SD bareng ambi Nurhariri, Kontributor Belambangan.com lan Bung Aguk Darsono teka Sanggar Merah Putih '45.
Syafaat nyampekaken saktemene puisi anggitane siswa MTsN 8 Banyuwangi kelawan tema anti kekerasan iku seru apike.
"Puisi hang nyeritakaken nasibe lare hang urip ring umah-umah wong tuweke hang akeh padu lan tukar kelawan judhul "Rumah Tak Bernyawa" iki perlu dadi pengenget kanggo wong-wong tuwek," jare Syafaat.
(Syaf/Aguk/Nurhariri)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
