Angklung Banyuwangi Ditetepaken Dadi Warisan Budaya Takbenda
Antariksawan Jusuf (dipublikasikan pada Senin, 23 Februari 2026 07:48 WIB)
- Laporan
Pemda Banyuwangi dina Minggu (22/2) nampa sertipikat kanggo Angklung Banyuwangi minangka Warisan Budaya Takbenda Indonesia (WBTI) teka Kementerian Kebudayaan RI.
Sertipikate, masiya diteken Menteri Kebudayaan Fadli Zon tanggal 15 Desember kepungkur, naming buru dielungaken ambi Kepala Dinas Kebudayaan dan Pariwisata Jatim Ibu Evi Afianasari, nang PLT Kadisbudbar Banyuwangi Pak H. Hartono, sore ring Taman Krida Budaya Propinsi Jatim Malang.
Acara hang nduweni judhul Penyerahan Apresiasi Seniman/Pelaku Budaya, Tunjangan Kehormatan Juru Pelihara Cagar Budaya dan Warisan Budaya Takbenda dibukak ring Gubernur Jatim Khofifah.
"Muga-muga berkah kanggo Banyuwangi," jare H. Hartono hang buru rong minggu madeg dadi PLT Kadis Kebudayaan dan Pariwisata Banyuwangi, ngganteni Pak Taufik.
"Penghargaan iki dadi bukti komitmen Pemerintah Kabupaten Banyuwangi ngelestarekaken, merujukaken lan ngubaraken sugihe budaya dhaerah lan uga minangka tetenger lan dadi mongkoge masarakat Banyuwangi," jare Pak Hartono nang belambangan.com bangete magih nong montor mulih teka Malang.
Penghargaan iki uga nguwataken aran Banyuwangi minangka salah siji dhaerah hang ajeg njaga warisane embah buyut.
"Iki uga wektu hang tepak kanggo nguripaken semangat nguri-uri teradhisi lan ngewarisaken nyang generasi mbisuke," jare Pak Hartono.
Merga nguri-uri iku hing mung sukur njaga hang wis bengen naming uga mbangun kanggo dina mengarep
Taun iki Kementerian Pendidikan, Kebudayaan, Riset, dan Teknologi ngelungaken 514 sertipikat warisan budaya sak Indonesia. Banyuwangi salah sijine. Ring Jawa Timur ana 20 kabupaten liyane hang uga nerima penghargaan.
Jare Arkeolog Museum Blambangan, Bayu Ariwibowo, angklung nduweni suwara has hang dadi penilaian utama.
Angklung Banyuwangi nduweni irama hang rancak kelawan teknik tabuh hang nduduhaken ciri husus masarakat agraris, jare Bayu.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
