Apresiasi Gendhing Nunggang Sepur (Bagiyan 2 teka 3)

Antariksawan Jusuf (dipublikasikan pada Sabtu, 17 Januari 2026 09:02 WIB)
- Opini

Apresiasi Gendhing Nunggang Sepur
(bagiyan 2)
Ditulis ring Hasan Sentot

Sakat kawitan, penganggit wis langsung nyeritakaken kahanan sosial Banyuwangi, antarane taun semono (1960-1070an), usume ama kresek ambi wereng, akeh wong tani hing bisa panen, merga parine rusak.
   Masiya gedigu, lare-lare (embok lan kakang) kaya sing ngarti, enak dandan ambi sisilan.
Ring bait ketelu, mangkat diceritakaken (simbolik) masalah kesenjangan sosial (Bapak turu kasur, emak turu ngisor). Bisa bain iki artine, Bapak (penguwasa) jaman sak mono sing nanggung sara uripe kaya rakyat (emak) hang digambaraken turu ngisor.
   Hang paling katon ring bait kepapat yaoku ananeberas bulgur. Kanggone dulur-dulur hang urip ning kutha, paling sing ngerasakaken kelendi rasane beras bulgur.
   Beras iki ditekakaken teka Amerika kanggo mbantu wong-wong Indoneshs hang ngadhepi larang pangan merga ama wereng ambi ama kresek mau. Ale bulgur iki jare nong negara asale dienggo pakan jaran. Rasane campak, jangane kudu asin, kelebu ya gerangasin hang magih murah jaman semono. Lemuru magih rega sak rupiah, dadikadhung pecahan Rp.10 ulih lemurune 10 lemuru gedhi-gedhi.
   Masiya angel beras, gizine wong Banyuwangi bisa teka iwak segara hang akeh bisa digoleti ring segarane. Jare asil penelitiyan, ya lemuru iki hang nggarahi uteke lare Banyuwangi encer (sapa hang nguyahi segara...).
   Gambaran wong-wong Banyuwangi jaman sakmono hang megawe mat-matian, disebutaken nang paman warah ngelempuh mulih wayah subuh. Taping nong bait sak teruse, Pak Bashir mangkat ngengetaken nang wobg-wong hang males, merga jaman semono buru uwal teka masalah politik, dadi magih akeh wong-wong ngobos ngalor ngidul ambi nyeritakaken kahanan negara hang wis kelebu dudu "wilayahe".
   Mangkane pemerintah Banyuwangi jaman semono sak liyane nyedhiyakaken pegaweyan, uga ngurubi tekade rakyate hang emeh kepaten. Iki ya dadi "problem nasional" jaman semono.

(Ana terusane)

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.