Buku Cerita Anak Anyar Dwibahasa Using-Indonesia

Nur Holipah (dipublikasikan pada Jumat, 13 Desember 2024 11:09 WIB)
- Laporan

Kadhung kepingin telikas, melakuwa dhewek. Dak kepingin lakune adoh, kudu jakakehan. Iku jare, John F. Kennedy hang tau dadi presiden Amerika Serikat.
Mula gedigu hang dirasakaken rombongan tim Banyuwangi hang ngadiri undangan Peluncuran Buku Cerita Anak Dwibahasa Kemis, 12 Desember 2024 sore. 

Jak 13 teka Banyuwangi nunggang sepur Sritanjung njujug nyang Hotel The Southtern Surabaya, Jalan Jemursari 110-112. Penulis akehe 10 (Urip Limartono Aris, Novi Susanti, Wahyu Rizki Kurniani, Ratih Puspa, Nur Holipah, Fais Zhatur Rosida, Andi Sep Kurniawan, Rayhan Rizki Fadhlillah, Putri Nurul Azizah, lan Sadam Muarif), papat liyane ilustrator (Januarispo Pratama, Apri Setiawan, Tasya Nabiella Buchori, Ayu Kusuma Wardhani). 
Careme gesah sak dawane dalan nyang Surabaya mula hing keneng dipenggak.
Mula acara peluncuran sore wis dianteni-anteni, merga buku-buku hang storyboard e wis melebu nyang Balai 'diiumbu' 6 ulan suwene sakat mareke Lokakarya ring ulan Mei 2024 sabene. 

Acara diadhiri Dr. Iwa Lukmana, M.A Kepala Pusat Penguatan & Pemberdayaan Bahasa kelawan njero kawat. Sak durunge mbuka acara, iyane ngomong gok mula target Badan Bahasa kudu bisa nambahi sumber literasi wacan kanggo lalare sak-Indonesia, embuh liwat sayembara utawa bimtek kepenulisan kaya hang wis dilakoni Balai Bahasa sak Indonesia. 
   Ary Setyorini, makili Dr. Umi Kulsum, M.Hum ring pucuke sambutane sampek ngomong liwat basanan: 
Ke perpustakaan baca ensiklopedia
Bisa membaca sesukanya 
Terima kasih Bapak Ibu yang berbahagia 
Sampai jumpa di peluncuran buku 2025 
Temune, kanggo nyepakaken naskah taun ngarep, bisa direng-reng sakat saiki. 

Liyane peluncuran, 85 penulis lan 38 ilustrator sak Jawa Timur uga disuguhi Dramatisasi teka lalare SMKN 12 Surabaya lan Pembacaan Buku Cerita Anak teka Komunitas Isyarat Indonesia (Bisindo).

Naskah Using ring antarane:
1. Aduan Wiji Asem (Urip Limartono Aris)
2. Ciblungan (Novi Susanto)
3. Barong Cilik (Wahyu Rizki Kurniani)
4. Markas Anyare Bayu (Nur Holipah)
5. Gandrung Cilik (Putri Nurul Azizah)
6. Aja Anggak (Ratih Puspa)
7. Yeay, Madhang Pecel Pitik (Fais Zhatur R)
8. Suwara Angklung Paglak (Fais Zhatur R)
9. Iki ya Pecel! (Rayhan Rizki Fadlillah)
10. Kasur Jejeran  (Rayhan Rizki Fadlillah)
11. Milu Emak Kundangan (Rayhan Rizki Fadlillah)
12. Sapa Hang Menang? (Andi Sep Kurniawan)
13. Untung Gawe Tembung (Sadam Muarif)
Wis hing kanti nak maca? Bisa rika jujug nyang web https://balaibahasajatim.kemdikbud.go.id/2024

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.