Cathetan Juri Cercen ring Festival Literasi Using 2025

Nur Holipah (dipublikasikan pada Jumat, 07 November 2025 06:44 WIB)
- Laporan

Cathetan Juri Cercen SD – Festival Literasi Using 2025

“Kari pating digugahi emake ya?” gedigu abane Satria Pujangga tepak mbeliyaki lan maca cerita cendhek lalare SD sak Kabupaten Banyuwangi, Sabtu 1 Nopember 2025.

Manggon ring SDN Model, cerita cendhek lalare SD hang dadi salah sijine lomba ring Festival Literasi Using 2025 iku dibiji Satria Pujangga, Alipah Alipuk lan Budiosing Setianto.

Salah sijine juknis muni: cerita hang ditulis kudu njuwut siji program 7KAIH (Tujuh Kebiasaan Anak Indonesia Hebat) hang antarane ana: (1) Bangun Pagi; (2) Beribadah; (3) Berolahraga; (4) Makan Sehat dan Bergizi, (5) Gemar Belajar; (6) Bermasyarakat; lan (7) Tidur Cepat. Mula program teka Kementerian Pendidikan, Kebudayaan, Riset, dan Teknologi (Kemendikbudristek) iki ana sakat Desember 2024.

Anane sarat ring juknis iku mau, pungkasane nggarahi cerita hang ditulis lalare seru terang-terangan nemen. Merga pitung ujar KAIH ditulis belaka suta, nggarahi ceritane kurang enak. Alihe aran cerita cendhek hang sipate fiktif, ya kudu ana ragine. Arane juri mestine ya nganteni lan golet jemedhore. Kelendi cerita bisa nggarahi munyik, cengeng (tertegun karena terpukau),utawa perasaan-perasaan liya hang dadi tenger gok cerita hang ditulis mau pantes diarani ‘sagah’.

Ana uga hang mung nyeritakaken adatane sabendinane, pungkasane juri kaya mung maca jurnal kegiyatan, isuk nganu paran, lohor tandang paran, mbengine aju paran. Yong arane lomba, kadhung cerita hang digawa iku wis mesti dilakoni wong liya (pisan), kudune ya bisa ngungkapaken ‘sesuatu yang berbeda dan unik’ gena juri utawane wong liya kaju.

Apike ring taun iki, wis nana hang ngangkati ceritane kelawan ‘wayah serngenge melecir teka bucu wetan’, merga jare Alipah Alipuk iku wis kuna sakat wingi taklam. Teka judhul wis katon peserta bisa milih ucap lan ujar gena nggarahi pembaca penasaran. Hang dikaju maning, tulisan lalare SD embuh gedrik lan latin rata-rata seru apike. Merga dhung tulisane mberkuwes, bisa-bisa pegaweyane juri tambah suwi. Enget kudu ngewaca siji-siji, anggere njuri cercen mareke kari. Mung siji peserta hang tata tulise selengkerahan, akeh nganggo kapital ring tengah ucap. Pumpung durung kelagot, kudu gancang-gancang dibecikaken.

Serehne jare Budiosing, bangete maca ya ana hang magih terbata, dhung jare Kang Ujik ‘mesosolen’ ucap Jawa kaya tah: iso, karo, bal, mbengok, resik, sambi, ben, yen, keri, jeneng, amarga, njut, bar. Alihe magih bisa digoleti delese. Mungne ya sing mangluh, merga hing kabeh uwong sak Kabupaten Banyuwangi riwayate deles Usinge.

Teka selawe kecamatan, ana Tegalsari lan Wongsorejo hang sing kirim wakil kanggone Lomba Cerita Cendhek.

"Taping apik wis, masiya tetak-tetak, taping gelem milu lan usaha bisa nulis cerita cendhek basa Using. Masiya tah wis, asale lalare iki dudu wong Using kabeh," pungkase Satria Pujangga, marek mbiji telulikur naskah. 
Mandaneya ring dina mburi, asil cerita cendhek lalare SD hang wis ana sakat 2023 iki bisa dadi sak buku. Aju didumaken nyang sekolahan sak Kabupaten, pantese tambah sagah. Mestine sumber ginau ring sekolahe tambah sugih lan akeh!

Mernying sak kaput arep diragi pelasan

Ring jembung didaleh mentas wajan

Basa Using puput disangga kelawan tulisan

Hing mung deles paseh ring lisan lan gesahan

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.