Isuk-Isuk Maca Gurit Kanggo Pahlawan
Antariksawan Jusuf (dipublikasikan pada Senin, 10 November 2025 06:06 WIB)
- Laporan
Isuk-isuk Maca Gurit Bareng Kanggo Pahlawan
Ditulis ring Muttafaqur Rohmah
Dina Ahad isuk tanggal 9 Nopember 2025 suwarane para penyair pating kumandang nong tengah-tengahe BCM (Banyuwangi Creative Market) ring Taman Blambangan.
Acara iki dianakaken Komunitas Lentera Sastra, megawe bareng ambi Dewan Kesenian Blambangan, Forum 28, lan para pegiyat sastera lan budaya Banyuwangi, kanggo mengeti Hari Pahlawan.
Lentera Sastra (LS) minangka komunitas hang dipandegani wong-wong ring Kementrian Agama, hang aktip ning literasi teka maneka unsur kayata para guru, pegawe KUA, Pembina Bimas, lan liyan-liyane. LS iki mauka ya akeh nganakaken kegiyatan-kegiyatan hang ana hubungane ambi budaya, literasi lan seni.
Maca gurit isuk iku dikawiti ambi Ketua Dewan Kesenian Blambangan Pak Hasan Basri hang maca gurite dhewek, hang nduweni judhul “Tak Perlu Ditunggu”.
Pak Hasan maca kelawan suwara hang lirih, alus teka njero ati, kerasa penghayatane. Gurite Pak Hasan mauka nyeritakaken pentinge enget nang wektu, sabar, lan arti kecaruk “tamu” ngibarataken “tamu” iki minangka "pahlawan hang lali diengeti”.
kujemput di ujung randu
rapuhmu tampak perkasa
perkasamu sejatinya rapuh
kapuk melayang tak sentuh
itulah tamuku
definisinya beribu kata
jangan kau cari di mana ia
tak perlu ditunggu
kau akan bertemu pada saatnya
Teka gurite mauka Pak Hasan kaya ngajak wong-wong hang ana ring Taman Blambangan isuk iku padha ngundha pikir, paran gunane nganteni, paran gunane dadi wong tulus, paran gunane nilai-nilai kepahlawanan lan simbol pahlawan nong njero ati.
Kabeh padha keplok anter seru, sakmarine Pak Hasan maca gurite hang ditulis dhewek mauka, gurit hang diwaca kawitan iku uga dadi tandha dikawitine roncean acara Panggung Puisi Hari Pahlawan.
Sakat jam enem isuk, dikawiti ring Pak Hasan, aju disusul wong-wong liyane hang maca gurite. Ana hang maca gurit anggitane dhewek, ana hang maca gurite sasterawan hang wis kesuwur kaya Chairil Anwar, WS Rendra, lan liyane.
Saya istimewa acarane kala Kapolresta Banyuwangi, Kombes Pol. Rama Samtama Putra, S.I.K., M.Si., M.H. milu maca gurit hang dijuwut teka buku "77 Penyair Membaca Pahlawan" hang judhule "Pahlawan Itu Bernama Rakyat" karya Mezra E. Pellondou.
kebengisan penjajah selalu melahirkan pahlawan
berselimut tenun ikat para lelaki bertarung gigih perempuan-perempuan terus menenun
siap dipakaikan pada kepala para lelaki
sang pahlawan yang pulang dari medan perang
Seliyane Kapolresta, para penyair hang tampil yaiku Fatah Yasin, Syafaat, Viefa, Herny Nilawati, Uswatun Hasanah, Lulu Anwar, Dalila S, Eny Susiani, R. Nazil, Nani Asiani, Faiz Abadi, Tirta Baiti Jannah, Muttafaqur Rohmah, Nurul Ludfia, Nukhbatul Fakhriroh, dan Azkia Kiska.
Kabeh padha maca gurit kelawan karakter hang maneka beda-beda, ana hang lirih, ana hang anter.
Jare Bu Viefa, penyair uga penggagas acara, kegiyatan iki hing mung maca gurit bain, taping ajakan kanggo nguweni makna nong Hari Pahlawan liwat karya sastera
“Kami ingin mengajak masyarakat memaknai Hari Pahlawan dengan cara yang lebih menyentuh nurani. Dari kata-kata, kita belajar menghidupkan semangat perjuangan,” jare Bu Viefa.
Sakliyane Bu Viefa, Pak Syafaat Ketua Lentera Sastra nambahaken kadhung Lentera Sastra iki dadi panggonan “kolaboratif lintas profesi” hang ngumpulaken seniman, guru, birokrat, lan masarakat umum, nang ngingsore Kemenag.
“Kami ingin menunjukkan bahwa ASN, guru, dan pegawai Kemenag juga bisa berperan dalam dunia sastra. Literasi itu milik semua,” digu ujare Pak Syafaat.
Sarta acarane emeh marek, kabeh penyair munggah nong panggung ambi nyanyi lagu “Gugur Bunga” diiringi pethikan gitar Riboet Kalembuan hang alus kaya silire angin. Suwarane wong kabeh dadi siji, dadi harmoni, sak suwara, sak ati kanggo ngurmati para pejuwang lan pahlawan bangsa.
Panggung Puisi Hari Pahlawan 2025 iki negesaken siji: "Sepanjang masih ada kata yang diucapkan dengan hati, selama masih ada komunitas seperti Lentera Sastra yang menyalakan cahaya literasi, semangat kepahlawanan tidak akan pernah padam. Selama masih ada mereka yang bersuara lewat kata, mengingatkan bangsa bahwa perjuangan tidak berhenti di medan perang, tapi juga di ruang-ruang terbuka seperti di Taman Blambangan tempat manusia menjaga kemanusiaannya."
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
