Lomba Video Kreatif Desa 2020, Panggonan Kreatifitase Nom-noman Desa

Moh. Syaiful (dipublikasikan pada Selasa, 07 Juli 2020 10:16 WIB)
- Laporan

Ana dhung 59 video kreatif hang wis dikumpulaken ana ring Panitia Lomba Video Kreatif Desa 2020 Banyuwangi ulan Juni 2020 manggon ana ring Gedung Graha Pena Jawa Pos Radar Banyuwangi. Lomba taun iki akeh peningkatan pesertane timbang lomba hang padha ring taun kepungkur. Taun 2019 kepungkur mung ana itungan welasan. Masiya ana alangan pandemi Covid-19 naming pesertane hang teka desa-desa ring Kabupaten Banyuwangi katone sing bisa keanggel pandemi iki.

Akehe peserta iki sing dinyana ring panitia Lomba Video Kreatif Desa 2020. Iku kabeh mesthine merga pembekalan hang wis dianakaken panitia lomba hang nekakaken narasumber nasional yaiku Arya Tedja Tjakrahadisurya, director of photography. Ring pembekalan iku ana dhung satus lare nom-noman hang disangoni kanggo nggawe video kreatif hang apik lan pantes makili desa nyang lomba tingkat kabupaten.

Naomi Aulia Firdausya salah sijine peserta lomba video kreatif hang makili desa Lemahbangdewo kecamatan Rogojampi  nyatakaken dhung iyane lan kelompoke wis ngupaya kanggo nggawe video kreatif desane, perkara menang lan kalah iku kabeh urusane juri. Kadhung menang mestine iku rejeki teka Hang Kuwasa.

Sakteruse Naomi nduwe keyakinan kadhung videone iki bisa nembus melebu nyang sepuluh besar merga videone  iki digawe beda ambi hang kaya biyasahe digawe uwong. Masiya padha-padha nduduhaken sumber dayane desa lan potensine desa video kreatif Lemahbangdewo iki disetting sejarah tahun 1760-an. Anane tokoh desa Lemahbangdewo yaiku hang aran Ki Uthun bisa tangi maning teka kubure kanggo ngajak lare-lare milenial makene gelem mbangun desane kelawan nduduhi sumberdaya lan potensi desane hang wis ana.

Gerda, salah sijine panitia Lomba Video Kreatif Desa 2020, hang dihubungi belambangan.com nyatakaken ring lomba iki pesertane kabeh total jenderal ana 67 ring pungkase wates pengumpulan. Kabeh video hang melebu bakal dijuri lan ditentokaken sapa pemenange, kadhung sedina mari ya sedinaan kadhung sing mari ya rong dina, gediku Gerda njelasaken serta meruhi akehe peserta. Teka 67 video kreatif arep dijuwut 10 pemenang bain.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.