Magenta Ngeraketaken Seduluran Wong Asal Genteng
Antariksawan Jusuf (dipublikasikan pada Senin, 31 Januari 2022 10:15 WIB)
- Laporan
Sepuluh taun kepungkur, tanggal 24 Januari 2012, ana lima wong wadon-wadon teka Genteng Banyuwangi hang ngumpul ring umahe mbok Titiek Setiowati, tepak iku magih dadi pulisi aktip. Pungkasan pangkate AKBP sedurunge purna tugas.
Sak liyane tuan rumah mbok Titiek, ana mbok Rini Sungkono anake wedana Genteng taun 1971 pak Sungkono, mbok Ning Sadhono anake kepala sekolah SMAN Genteng pak Sadono, mbok Yuliastutik adhike penyanyi Yuliatin, lan mbok Wartilah rabine pejabat bank pemerintah.
Merga wong Banyuwangi ring Jakarta jaman semono kecaruke mung tepak halalbihalal, wong-wong iku setuju nggawe kumpulan wong asal Genteng ring Jakarta hang diarani Orgen (Orang Genteng). Naming merga arane bisa dipelesetaken dadi Orang Gendeng (wong edan), wong-wong sak kancaan iku sepakat arane disiluri dadi Magenta (Masyarakat Genteng dan Sekitarnya). Setemene usulan aran teka mbok Rini kawitane Margenta, naming makene enak jare mbok Titiek Magenta bain. Mbok Titiek ya sekaliyan didadekaken ketuwane. Naming organisasine ya sak derma kegiyatan arisan lan kelenceran bareng-bareng. Kayata nong Puncak, nong Anyer, hing tau ana kegiyatan husus.
Buru tepak mengeti dina dadine hang kaping 10 iki, Magenta hang saiki wis dadi salah siji Kelompok Masyarakat (Pokmas) Ikawangi Pusat, bareng ambi Pokmas lan korwil liyane kayata Prajurit Blambangan, Ikabaru (Ikatan Keluarga Kalibaru), Gowes Ikawangi, iyane nggawe iwuhe kelawan ngundang Ikawangi lan Pokmas liyane ring Buperta Cibubur dina Minggu sore.
Acarane mung ana Sambutan teka mbok Titiek minangka ketua Magenta, uga ana pidhato teka kang Bambang Sugiyono, wong asal Genteng hang uga Ketua Umum Ikawangi Pusat.
Ring pidhatone kang Bambang ngejak dulur-dulur Ikawangi kabeh ngeramekaken acara Ikawangi Cycling Nusantara (ICN) yaiku acara sepidhahan teka Bandara Banyuwangi nyang Pendhapa Sabha Swagatha Banyuwangi.
Acara ICN hang wis melebu ring agenda Banyuwangi Festival 2022 iki uga salah siji kegiyatan kanggo mengeti 50 taune Ikawangi hang diedegaken tanggal 16 September 1972. Bengene magih aran Pewangi Jaya (Perkumpulan Warga Banyuwangi Jakarta Raya), hang aju digenti dadi Ikawangi.
Jare mbak Titiek grup WAne bengen anggotane akeh emeh 100 uwong, naming merga kasus salah siji anggotane hang ngelebokaken masalah politik, akeh wong-wong hang metu. Grup New Magenta saiki mung kari 50an anggotane.
Masiya acarane sederhana mung ana organ tunggal lan ketipung, naming hang teka ana wong 200an, katon guyub lan rumang. Ana hang teka Bekasi, Depok, Bogor, Jakarta, Tangerang Raya, Tangerang Selatan, lan liya-liyane. Nawi merga hadhiyah lawange (door prize) hang akeh emeh 100 bungkus kelebu kipas angin, sepidhah pancat loro lan kulkas siji.
Mbok Titiek ngarepaken mengarepe Magenta saya raket, aja dirusak nganggo politik makene wong-wong Genteng ring Jakarta lan sak ubengane sedulurane saya guyub lan milu ndukung program-programe Ikawangi.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
