Anggitane: NURHARIRI
(Minggu, 17 Desember 2023 05:49 WIB)

Mayo Ngaji lan Sepi Ati , Batakane Endi?

MAYO NGAJI

Melik melik katon siji

Diuber paran karepe

Magih cilik diwulang ngaji

Mbesuk gedhi aji uripe

Nganggo kelambi dipelentreng

Melaku-melaku puter kayun

Ayo ngaji hang patheng

Mbesuk gedhi makene sing getun

Isuk-isuk tuku ketan

Ambi lungguh ngombe kopi

Ngaji iku kewajiban

Lanang wadon kudu ngelakoni

Tuku gabah sing mung siji

Diuwot cikar magih lega

Wong ngambah dalane ngaji

Digampangaken liwat dalane suwarga

Nonton gandrung ampyak-ampyakan

Gendhinge aja cilik ati

Ulihe ngaji sampek kapan

Sakat cilik temeka pati

Parine wis melecuti

Manuke sak arat-arat

Aja males ulihe ngaji

Makene selamet donya aherat

Kari enak ulihe turu

Diajak ngomong celamutan

Wuruk ngaji kudu ring guru

Sinau dhewek gurune setan

SEPI ATI

Ana tah angin hang liwat

Sun arep cerita lan sambat

Ulan andhung andhung sing gawe gundha latar

Sunare ilang byar semebyar

Tembang lan gendhing

Kembang gula kegawa angin garing

Kelonana mantra hang pungkasan

Sabuk mangir singset ring petilasan

Kadhung pancen rumangsa

Gelepung sawi hang dadi cerita

Cumpune cengkir kelapa cilik

Janji mungkir sing ana balik

Jae wana ngarep tetese udan

Nelangsa nyandhing belimbing bumi

Oyang ati kaya wong edan

Nelangsa nanggung susahe ati

Sawangen serngenge wis melecir

Nyepuh tanah segara hang ngerandhu

Sing bakal ilang ulihe lsun ngesir

Sepi ati wis kadhung kepilu

BWI, 27 Agustus 2020

BATEKAN

Dhik ayo Dhik Rika meriniya

Eh ana paran Kang Rika kari maksa

Ayo batekan Dhik timbang rasan-rasan

Gancang ngomonga Kang batekane paran

Dicokot nyokot Dhik paran batekane

Kari muyab Kang Rika pitakone

Sing paran-paran Dhik iki mung batekan

Dicokot nyokot Kang lobok pedhes temenan

Ditekek nguyuhi Dhik paran arane

Takonan Rika Kang kari nyukeri

Isun mung takon Dhik paran batekane

Kendhi diuyub Kang cangkem diuyuhi

Melebu kenceng Dhik metune lemes

Pikiran Rika Kang aja kari ngeres

Isun sing ngeres Dhik gancang dibales

Wong mangan tebu Kang Rika kari ndhedhes

Ayo dibatek Dhik dicokot ngidoni

Takonan Rika Kang ngelik-ngelik ati

Ayo jawaben Dhik aja kepelayon

Enak rasane Kang iku jajan kelepon

Melebu miring Dhik metu uga miring

Suwi-suwi Kang  Rika kaya wong sinting

Ayo jawaben Dhik Rika aja muring

Iku gampang Kang ya arane kancing

Lirix Al Harir

23 Januari 2023

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.