Rerijig, Dheket Dadi Kriya ring SD Kalipuro
Antariksawan Jusuf (dipublikasikan pada Senin, 21 April 2025 18:12 WIB)
- Laporan
Ring donya iki saya suwi hang aran dheket/romot/sampah wis saya angel dicandhak. Menungsa ngerah gampange. Saiki emeh kabeh hang aran panganan utawa barang sasate mesthi diwadhahi pelastik. Masiya weruh gok pelastik, pungkasane mung dadi dheket. Kadine ring endi bain katon hang aran dheket iku leleran.
Masalah kang gedigu iku sing mung dadi tugase Dinas Kebersihan naming wis kabeh kedinasan kudu bisa milu periatin uga nyegah. Paran maning hang aran sekolahan, mesthine dadi panggonan kang ana sampah merga durung kabeh lalare ngarti pentinge rijigan.
Salah siji cara hang dienggo rerijig yaiku dhekete iki mau disulap dadi barang hiasan (kriya).
Hing maido, SD Negeri 2 Gombengsari kecamatan Kalipuro milih cara kang diarepaken bisa nguwah dheket dadi barang kriya. Kayata styrofoam wadhah sega diuled ambi semen putih bisa dadi pot, aju pote dilukis, kertas dikombinasi ambi jajang bisa dadi setrungking.
Programe diuwani aran PEWARIS JAGAD (Pemanfaatan Wadah Tak Berguna untuk Kriya dan Seni dalam upaya Menjaga Dunia).
Ring inopasi iku, dheket didadekaken barang hang nduwe nilai jual lan nilai seni.
Minangka instruktur, guru-guru ring SD Negeri 2 Gombengsari nggandheng komunitas Pecinta lingkungan kaya dene Green Yasmin yaiku komunitas pemerhati sampah, Belle Studio nguwani ilmu carane ngelukis lan UKM Pilar Bangsa teka mahasiswa UNTAG Banyuwangi hang lila geratisan nguwani ilmu nang lalare.
Jare salah siji guru hang dadi panitiya, Dwiana Meidianita. Pelatihan iki dianakaken saben dina Sabtu. Merga diarepaken bisa ngurangi sampah pelastik ring sekolahan kono. "Kadhung bisa rijig kabeh, wektune hing diwatesi."
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
