Wekase Wakil Bupati Jember nang Ikawangi
Antariksawan Jusuf (dipublikasikan pada Jumat, 11 Maret 2022 11:24 WIB)
- Laporan
Tepak nekani acara Gandrung Sewu Nusantara 2021 hang dianakaken kelawan cara virtual ika, Wakil Bupati Jember KH MB Firjaun Barlaman ngewani wekas nong Ikawangi supaya milu bareng-bareng ngembangaken donya kelenceran Jember makene bisa kesuwur kaya Banyuwangi.
Jare Ketua Ikawangi Jember, kang Rohman, wekase Wakil Bupati hang kesuwur kelawan aran Gus Firjaun iku cocog ambi misine Ikawangi. "Yaiku nggawe manpaat nang wong sak ubengane," jare kang Rohman nang belambangan.com dina Jemuah 10 Maret.
Masiya anyar, Ikawangi Jember kelebu salah siji teka 25 dhaerah hang milu ngeramekaken acara Gandrung Sewu Nusantara ulan Desember 2021 sore. Ana pisan hang teka Batam, Balikpapan, Banjarbaru, Bontang, Denpasar, Lampung, Jakarta, Jayapura, Jambi, Kediri, Kendari, Kupang, Lampung, Medan, Malang, Mamuju Tengah, Mimika, Nabire, Palembang, Pekanbaru, Palembang, Sorong, Surabaya, Tarakan, Hongkong lan Taiwan.
Mangkane tepak arep kedhayohan wong-wong rombongan panitiya Ikawangi Cycling Nusantara (ICN) minggu ngarep hang rencanane mampir liwat Jember, Ikawangi Jember wis nyiyapaken panggonan yaiku Wisata Buah Naga Taman Gading.
"Setengahe ya arep nggawe panggonan ngelencer ring Jember saya kesuwur," jare kang Rohman. Lan kaya acara Ikawangi biyasahe, Jember arep mapag tekane dhayohe ambi tari gandrung.
Ring acara iku arep diserahaken bendera hang maune arep diarak nganggo sepidhah teka Jakarta nang Banyuwangi. Setemene, acara ICN tanggal 19 Maret teka Bandara nang Pendopo Sabha Swagata Blambangan arep dikawiti ambi Kirab bendera hang digawa ring sepidhah teka Jakarta nang Banyuwangi. Cumpu Kirabe mau wurung.
"Sedurunge melebu Banyuwangi kudu ngaso sulung. Paran maning Ikawangi Jember iki magih anyar kudune kenalan ambi Ikawangi hang ana ring Jakarta," jare kang Rohman. "Ngaso sak jam rong jam marek iku nerusaken lakune ngetan."
Saiki Ikawangi Jember ya sithik-sithik wis diejak kanggo ngembangaken donya kelenceran ring Jember. Kebeneran ana penguruse hang milu Pokdarwis ring Banyuwangi. Sore ana pelatihan Pokdarwis Jawa Timur hang dianakaken ring hotel Aston Jember. Jember setemene nduwe akeh penari gandrung sampek 50, taping akeh-akehe magih ketungkul ambi pegaweyan. "Sore nong pelatihan Pokdarwis kene wis diwekasi kongkon nggolet lan ngembangaken gandrung lanang, gandrung Marsan."
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
