Basar Hang Ngadol Inopasi Pendhidhikan
Nani Asiany Mustikowati (dipublikasikan pada Senin, 12 September 2022 08:53 WIB)
- Laporan
Pemerintah Kabupaten Banyuwangi hususe Dinas Pendidikan sing leren-leren megiyet inopasi kanggo majokaken Banyuwangi ndhukung ndadekaken Kabupaten Paling Inovatip sak Indonesia.Taun iki wis taun kaping telu mujudaken Kabupaten Paling Inopatip. Mula ana bain inopasine. Kang sun tulis saiki arane Basar Inovasi. Nurut sedinane kang aran basar iku yara dodolan panganan. Taping basar ring kene dudu adol panganan. Kang diedol inopasi kang wis ana ring sekolah, wis diperaktekaken. Kerana rumangsa Inopasi iki mula pantes diedol nang sekolah liya, mangkane sekolah- sekolah kang wis dhaptar milu Bazar nyang Dinas Pendidikan, kudu siyap dituku sekolah liya. Nurut Kepala Dinas Pendidikan Kabupaten Banyuwangi, Suratno, S.Pd, MM ring acara Pembukaan Bazar Inovasi Pendidikan kang nganggo cara virtual, sekolah kang milu Basar Inopasi iki sak kabupaten ana 26 sekolah, SD lan SMP. Jare iyane sekolah-sekolah kang tuku ring basar inopasi mau, kudu siyap ATM (adopsi, tiru, dan modifikasi). Dadi sing mung tuku-tuku thok tapi mari ndeleng, ngamati, ngerungokaken penjelasane kang adol inopasi, aju sepakat tuku inopasine. Carane tandha tangan MoU antarane kang adol (kang duwe inopasi) ambi kang tuku. Taping kang tuku uga kudu bisa milih inopasi paran kang bisa diterapaken ring sekolahe. Sing mara-mara kabeh inopasi dituku. Conto: SDN Kebalenan adol loro inopasi. Kang tuku bisa bain milih siji bain inopasine kerana inopasi sijine wis diterapaken nong sekolahane. SDN 1 Lateng adol sangang inopasi, SDN Kepatihan adol limang inopasi, lan SDN 4 Penganjuran adol lebih akeh maning inopasine. Tambah akeh kang diedol, kang tuku tambah dhemen merga bisa milih-milih inopasi paran kang arep dituku.
Salah siji sekolah kang milu Bazar Inovasi Pendidikan yaiku SDN Kebalenan. Sekolah iki adol loro inopasi. Kang siji aran dodolane yaiku Duqu singkatan teka Duta Qur’an, lan sijine diarani Si Pencil dan Si Gulis singkatan teka Sinau Bareng Penulis Cilik lan Sinau Bareng Guru Penulis. Ring kana sakmarine milu acara Pembukaan Virtual, dijelasaken ambi Tatik Sugiwati, S.Pd, kepala SDN Kebalenan kadhung loro inopasi iki wis pantes kadhung diedol. Duqu contone. Serta duwe inopasi kang isine ana tahfiz/apalan surat-surat cendhek kang ana ning Quran lan qiraah. Saiki serta inopasi Duqu kang dibimbing Ustadz Fuad wis melaku wolung ulan wis bisa dideleng asile. Ana kang wis apal juz 30, lan ana kang wis bisa qiraah. Semono uga inopasi sijine kang dibimbing Rina Kartika, guru Bahasa Inggris ring SMAN 1 Giri Taruna Bangsa Banyuwangi wis ngasilaken pirang-pirangane buku kang ditulis murid-murid lan guru-guru SDN Kebalenan. Buku kang dipajang ring rak ngarepe hadirin iku asile teka inopasi iki mau. Ana kang nulis gurit (nganggo Bahasa Indonesia, Bahasa Using, Bahasa Jawa, lan Bahasa Inggris), nulis cerita, cerita gambar, malah ana kang wis nulis ning majalah Bobo, majalahe lare-lare. Rina Kartika kang mula ditekakaken sekolah makene dadi narasumber ring acara Bazar Inovasi iku njelasaken kadhung nulis iku mula butuh waktu merga omes-omesan. Masiya wong-wong utawa lare-lare saiki kuwat maca cetinge WA sampek jam-jaman taping kadhung dikongkon maca buku kang sakbenere durung karuwan pernah. Masiya tawis wong nulis iku sing kerana maca thok. Liwat pengalaman, pikirane, utawa ndeleng uga keneng.
Acara Basar Inopasi tepak dina Sabtu tanggal 10 September 2022 ring SDN Kebalenan mula meriyah. Sakliyane dihadhiri sekitar 78 tamu teka 40 sekolah kang tuku inopasine, uga ditekani Pengawas SD, lan setap teka Dinas Pendidikan. Ring kana uga nampilaken murid njuged tari gandrung lan jaranan buta, kang ahire acarane ditutup ambi deleng-deleng buku- buku kang dipameraken lan potrek bareng.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
