Juwara Patrol lan Kundaran 2024
Antariksawan Jusuf (dipublikasikan pada Kamis, 28 Maret 2024 06:46 WIB)
- Laporan
Final Festival Budaya Ramadhan 2024 wis digelar Senen bengi kepungkur (25/3), nampilaken lima Finalis Patrol wakil teka Kecamatan Banyuwangi, Belimbingsari, Cluring, Kalipuro, Srono lan lima Finalis Kundaran wakil teka Kecamatan Glagah, Belimbingsari, Banyuwangi, Singojuruh uga Cluring.
“Isun njaluk sepura ning kabeh dulur Banyuwangi hang wis kadhung ngadhang kelilinge peserta patrol. Kerana unibengi udan, dadi peserta patrol mung ditampilaken ring pentas, padha ambi peserta kundaran. Dinas Kebudayaan dan Pariwisata polae wis kadhung ngirim surat ring lurah-lurah hang wilayahe diliwati peserta patrol supaya masang umbul-umbul, damar kelap-kelip lan ngurag wargane supaya ndeleng ring pinggir dalan kampung hang diliwati,” abane Plt. Kadisbudpar, Taufik, direwangi Kepala Bidang Kebudayaan Disbudpar Banyuwangi, Dewa Alit. Masiya latar kidul Setadhiyon Diponegoro lan sakubenge nerima udan kician, hang ndeleng malah dhemen kecek.
Bupati Banyuwangi Ipuk Fiestiandani nyampekaken kadhung pemerintah duwe kewajiban nguri-uri paran hang merujuk lan urip ring masarakat.
“Apatah iku masalah kuliner, adat lan tradhisi, paran maning masalah seni. Mulane masarakat hang nduweni potensi iku kudu saya ningkataken kuwalitase, makene keneng dienggo milu njunjung arane Banyuwangi. Kadhung masarakate dhewek males ulihe nguri-uri, ya nana gunane ulihe pemerintah getem-getem njunjung kearifan lokal Banyuwangi supaya saya digandrungi,” abane Mbok Ipuk.
Mari ndeleng lan maspadakaken tampilane peserta pinalis, golongane juri aju rapat sampek kelakon jam 00.25 Wib. Saben juri nduwe cathetan lan alasan dhewek-dhewek kanggo ngasilaken Penyanyi Terbaik, Tata Musik Terbaik, Koreo Terbaik, Busana Terbaik lan Penyaji Terbaik. Juri hang akehe pitu yaiku Subari Sofyan, Juwono, Sunardiyanto, Suko Prayitno, Adlin Mustika, H. Abdullah Fauzi lan Muhamad Ikwan mutusaken kanggo Patrol: Penyanyi Terbaik, Tata Musik Terbaik lan Tata Busana Terbaik taun iki direbut Tim Kec. Banyuwangi lan Penyaji Terbaik uga Koreo Terbaik direbut Tim teka Kec. Cluring. Sedheng kanggo Kundaran: Penyaji Terbaik, Tata Musik Terbaik, Koreo Terbaik lan Penyanyi Terbaik direbut Tim Kundaran teka Kec. Singojuruh. Dene Busana Terbaik direbut Tim Kundaran teka Kec. Cluring.
Ketua Dewan Juri direwangi para anggotane nyampekaken kadhung kabeh pinalis iku apik-apik. Mung bain, ana hang sing cocog ambi ketentuan-ketentuan panitiya, kaya contone masalah identitas kependudukane, ana asesoris Pemusik hang kurang pas kanggo dakwah ring ulan puwasa lan ana uga alat musik hang kelebihan wilahane. Iku keneng dianggep pelanggaran hang bisa ngurangi bijine,” abane ketuwa panitiya seniman multi talenta Kang Subari Sofyan iku ambi nambahi kadhung keputusane Dewan Juri iku keneng dipertanggungjawabaken.
(Kang Ujik)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
