KH Anwar Iskandar, Wong Banyuwangi Madeg Dadi Ketua MUI
Antariksawan Jusuf (dipublikasikan pada Rabu, 16 Agustus 2023 08:00 WIB)
- Laporan
Wong Banyuwangi asal Berasan/Tambakberas KH. Anwar Iskandar kepilih dadi Ketua Majelis Ulama Indonesia (MUI) ring Rapat Pleno MUI hang digelar ning Hotel Bidakara Jakarta dina Selasa (15/8).
Sedurunge, ketua MUI dijabat ring Pak Miftachul Akhyar hang mundur tahun 2022 sore merga kepilih maning dadi Rais Aam PBNU. Tepak kosong nana ketuwane, MUI dipimpin bareng ring wakil ketua yaiku Buya Anwar Abbas, KH. Marsudi Syuhud, lan Buya Basri Bermanda.
Rapat Plenone sore dipimpin ring Rofiqul Umam Ahmad arep nyampekaken asile nyang rapat paripurna MUI.
Kiyai Anwar iki dudu "wong anyar" merga seduluran kabeh dadi kiyai. Hang wis kesuwur sedurunge ring telatah nasional yaiku ruwahe KH Nur Iskandar SQ hang duwe pesantren Asshidiqiyah Kebon Jeruk Jakarta. Ana kakange siji maning ruwahe Kiyai Ali Muhaidori Singonegaran.
Kakange hang liyane yaiku ruwahe KH Syadzili Askandar lan adhike KH Baidhowi Askandar Berasan lan ruwahe Nyai Jauharoh. Dene dulur beda emak ana ruwahe KH Nur Hadi Askandar Al Barsani Purwokerto (bapake ruwahe Pak Yusuf Nuris hang tau dadi wakil bupati Banyuwangi 2005-2010), aju ana ruwahe KH Nur Chozin Askandar Malang lan KH Nur Shodiq Askandar, Wakil Rektor 3 Unisma Malang lan Ketua LP Maarif NU Jatim.
KH Anwar dhewek setemene manggon ring Pesantren Jamsaren Kota Kediri. Iyane kesuwur minangka sesepuh ring NU lan tau dadi wakil ketua Dewan Pertimbangan MUI.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
