Muludan Likuran ring Desa Tambong, Kabat
Antariksawan Jusuf (dipublikasikan pada Senin, 24 Oktober 2022 08:13 WIB)
- Laporan
Bida desa mawa cara. Gedigu ujare uwong tuwek bengen. Desa-desa ring Kec. Kabat, masiya sing kabeh, kadhung ngeramekaken Muludan mesti diramekaken kelawan arak-arakan jodhang. "Makene sing ana kesan ngawur, panitiya bareng-bareng ambi Pemerintah Desa Tambong ngewajibaken saben wilayah RT milu arak-arakan kelawan tema hang uwis diundhi. Ana hang keneng tema Gajah, nggambaraken kendharaan hang dienggo pasukan Raja Abrohah hang arep ngerubuhaken Kabah. Ana hang ulih tema Raja Abrohah, Ababil, Jaran, Unta, Burok, Perahu, Wali Sanga, Masjid, Bedhug lan ana uga peserta partisipan remaja hang nampilaken Kereta Kencana lan Ula Irus," abane Lurah Tambong, Agus Hermawan. Mantan karyawan PT. KBR iku njelasaken kadhung saben-saben tema iku dibiji ambi juri teka Dinas Kebudayaan dan Pariwisata lan teka Dewan Kesenian Blambangan (DKB). Juri-juri iku mbiji kelawan pathokan Kesesuaian Tema, Makna. Filosofi lan Atraksi.
"Ngenengi masalah pathokan Kesesuaian Tema lan Filosofi uwis dibiji sedina sedurunge, nalikane wujud-wujud tema iku magih ana ring wilayah RT-ne dhewek-dhewek. Pathokan biji utawa kriteria Atraksi dibiji nalikane digawa pawai malem ahad (22/10), " jare H.Ilham salah sijine juri hang teka DKB. Kadhung dideleng ramene pawai, masarakat Desa Tambong kaitung guyub. Emeh kabeh warga milu pawai. Hang ndeleng teka masarakat jabane Tambong. Uyel-uyelan sedawane dalan desa. Ewon. "Lha.....mulane panitiya uga mbukak UMKM produk-produk masyarakat Tambong. Kesempatan kanggo ngangkat perekonomian Desa Tambong. Acara rame-rame iki sabene uga dikawiti kelawan arak-arakan Endhog-endhogan hang pesertane teka para santri TPQ lan santri langgar. Mari-mari rame kemeriyek. Ahad isuk dianakaken selametan ingkung ancakan ring masjid lan malem Senene (23/10) sakat jam pitu bengi dianakaken hiburan rakyat kelawan nekakaken Pelawak Ali Kenthus. Panggunge ring ngarepe Bale Desa Tambong," abane Ketua Panitia, Samsul Muarip.
Nalikane diumumaken sapa hang menang, masarakat lega ulihe nerima asile. Kerana hang mbiji dudu juri sembarangan. Paran maning sedurunge diumumaken asil lombane, juri teka Disbudpar nguweni penjelasan paran iku artine jodhang lan kelendi kudune hang aran barisan arak-arakan hang uwis ditamtokaken temane iku.
Pungkasane serta diumumaken juara 1 dimenangaken tema Gajah, juara 2 tema Ababil lan juara 3 pemenange tema Burok. Petang peserta melebu dadi juwara harapan, petang peserta liyane dadi juwara unggulan lan loro peserta paporit yaiku Ula Irus lan Kereta Jaran.
Juri Kang Ujik ngusulaken kadhung wujud-wujud tema hang uwis digawe iku aja dirusak. Kadhung bisa dipasang ring bucu-bucu pertelon utawa perapatan, digawekaken, dikudhungi pondhok welit lan sakubenge digawe taman RW.
"Makene sing mubadir. Malah-malah keneng dienggo taman selpi ambi lare -lare lan bisa ngundang uwong jaba teka ring Desa Tambong. Taun ngarep kadhung pancen dianakaken acara hang kaya gedigu iku mau, para ketua RT lan RW uga para remaja kudu diweni penjelasan sulung, saingga bisa mbedakaken paran iku jodhang lan paran iku ogoh-ogoh," abane Kang Ujik mungkasi wewarahe ning kabeh peserta.
Pawai uga diramekaken marchingband teka SMK Pradana Giri lan uga diramekaken kelawan pencak geni teka para remaja Desa Tambong.
(Kang Ujik)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
