Rejeki Teka Museum Blambangan
Antariksawan Jusuf (dipublikasikan pada Jumat, 10 Februari 2023 07:46 WIB)
- Laporan
Museum Belambangan hang ana ring jerone latar Dinas Kebudayaan dan Pariwisata Kabupaten Banyuwangi, saben disanjani lare-lare TK sampek pelajar SMA/SMK mesthi dibarengi kelawan tekane uwong jaja panganan. Sakat teka bakpaw, enyen utawa bakso, cilok lan liya-liyane. Kayadene hang kedaden Rebo (8/2) sore, nalika ana kunjungan lare-lare TK Kecamatan Cluring. Ana lare 50 nunggang bis njujug ring kantor Disbudpar.
"Larene ana 50 Pak. Apak lan emake? Kadhang kakange lare-lare iku ya milu. Akeh uwong tuweke hang ngawal bis nganggo sepidhah udhud, ana uga hang nggawa montor gedhi. Dadi ya rame Kang. Mulane akeh uwong dodolan padha teka merene. Makene wis. Arane uwong golet pangan. Bara rame. Kanca-kanca karyawan hang istirahat sing mulih, bisa belanja panganan ring uwong-wong iku," abane Kepala Bidang Kebudayaan Disbudpar Banyuwangi, Dewa Alit nalika diajak gesah ambi belambangan.com.
Wangune uwong tuweke lare-lare TK hang teka iku mula duwe niyat milu ngelencer. Nyatane akeh hang padha nggelar kelasa ring bucu-bucu latar Disbudpar aju lungguh-lungguhan sak paran-paran.
"Sakliyane sanja museum, rombongan aju ngelencer ring Boom Marina lan pungkasan engko njujug ring Taman Belambangan. Pumpung anak ana acara, wali murid iki padha milu kelenceran ambi milu ngerewangi guru hang jumlahe mung sithik, Pak. Hang penting lare sing cerewet lan ulih pengetahuan teka jabane sekolahan," abane salahsijine wali murid, Asiyah.
Ngenengi masalah uwong hang dodolan panganan, panggonane magih durung ketata lan sing kira ditata ambi pihak Disbudpar. Merga sipate mung tempelan. Kala-kala akeh pengunjung museum, wong dagang iku padha teka. Pengunjung ngalih, wong dagang ya ngalih pisan.
"Masiya jare sing sampek setengah dina Isun mangkal ring kene, taping lumayan Kang. Asile wis katon. Sedhilutan bain Isun uwis ulih picis seket ewu rupiyah. Iki rombongan durung mingser ring panggonan liya. Hang tuku magih bisa tambah maning, Kang," abane Ansori, hang adate dodolan cilok ring ngarepe kantor Komisi Pemilihan Umum Kabupaten Banyuwangi.
(kang ujik)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
