Rombongan Gedhi Ikawangi Sumatera Selatan mulih Kampung
Antariksawan Jusuf (dipublikasikan pada Selasa, 25 Oktober 2022 10:10 WIB)
- Laporan
"Seperene iki rombongan wong Banyuwangi mulih kampung hang paling gedhi," jare Kepala Dinas Kebudayaan dan Pariwisata MY Bramuda tepak nerima dhayoh Ikawangi.
Kang Bram tepak didhayohi rombongan Ikawangi Korwil Sumatera Selatan hang dipimpin langsung ring ketuane Kang Suroso. Iyane nggawa anggotane nyarter bis hang isine 50 wong ditambah telung montor teka telung keluwarga hang saben-saben keluwarga ana limang anggota. Malah serta wis gadug umahe dhewek-dhewek, rombongane nambah 20 wong maning. Sak suwine seminggu kelebu nang dalan lan kesuk wis arep padha mulih, ana hang miloni bise, ana hang nunggang montor, ana hang kaya Kang Suroso nunggang pesawat.
"Misine Tilik Kampung polae ana hang wis 30 taun hing tau mulih. Sakat terbentuk Ikawangi, semangat kedhaerahane njumbul maning. Hang lair nong Palembang ya ana buru weruh tanah asale," jare kang Suroso hang asal Kali Setail. Rombongan iku mula ana hang teka Setail, Bedewang, Kelir, Tegaldlimo, Muncar, Grajagan.
Tujuwan utamane rombongan jiarah nong para sesepuh Banyuwangi nang Tegaldlimo, Muncar lan Bedewang dhewek. Aju terus nyang Pulau Merah, Watudodol, Kemarang aju nong pantai Boom.
Pak Bram ngundang nang kantore diduduhi museum Ijen Geopark, aju diterusaken nang Kemarang. Sakliyane Pak Bram, ana Pak Rido sekdinbudpar. Mesthine ana pisan ketua DPR pak Made Cahyana tapi diwakili Bu Utami hang teka Hanura.
Wong mulih kampung biyasahe mulihe lebaran. "Sayang jadwale kesulungan booking bis dadi luput jadwal Gandrung Sewu."
Wong-wong iku rata-rata wong swasta, pedagang lan petani, dadi wektune bisa rada longgar. Ana pisan hang pegawai kecamatan siji, yaiku Ketua OKI kang Fauzi.
Ana keluwargane Pak Hasim teka Gerajagan, iku ana 30 warung pecel lele. Kadhung lebaran mulih ana 30 mobil. Keluwarga teka Kelir ya duwe warung gedhi "mbak Lestari" hang sedhiya masakan Jawatimur.
"Ikatan wong Banyuwangi lebih kenthel. Malah ana wong Lamongan hang lakine wong Banyuwangi taping iyane kebih dhemen milu kumpulane wong Banyuwangi timbang milu kumpulane Lamongan," jare kang Suroso.
Ring Sumatera Selatan kira-kira ana 60.000 KK wong Banyuwangi. Saiki wis ana 6 korwil lan ring bungase taun iki arep nambah 2 maning.
,
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
