Sangang Buku Anyar Cerita Anak Using-Indonesia

Nur Holipah (dipublikasikan pada Kamis, 14 Desember 2023 06:57 WIB)
- Laporan

Kadhung uwong ngomong dak 12/12 iku 'tanggal cantik' mula tepak, merga ya dipilih ambi Balai Bahasa Provinsi Jawa Timur kanggo Peluncuran Buku Cerita Anak Dwibahasa taun rongewu telulikur.

Dina Selasa sore, (12/12/2023), manggon ring Balai Riung Mercure Grand Mirama Hotel hang ana ring Jalan Raya Darmo 68- 78 Surabaya, 4 penulis buku cerita anak Basa Using- Indonesia milu ngadiri acara. Yaiku: Urip Limartono Aris, Andi Sep Kurniawan, Nur Aini lan Nur Holipah. Jak papat, wis milu seleksian hang sakdurunge dianakaken ring ulan Maret, penandatanganan kontrak ulan April, Penelaahan lan Lokakarya Naskah ulan Mei, aju peluncuran ring ulan Desember iki.

Ana 85 total penulis cerita anak dwibahasa: Using, Madura lan Jawa.

Teka Using rinciane:

Sakliyane 4 penulis, ana 2 ilustrator teka Banyuwangi hang uga dadi undangan, yaiku Apri Setiawan lan Lutfi Setiawan. Makili penyeleksi lan penelaah, ana H. Abdullah Fauzi hang uga teka. Hang ulih undangan Penelaah, Antariksawan Jusuf, hing bisa teka ring iwuh iku.

Kepala Pusat Penguatan & Pemberdayaan Bahasa, Badan Pengembangan dan Pembinaan Bahasa Dr. Iwa Lukmana, MA hang mbuka acara kelawan zoom meeting, ngomong gok seru mongkoge nyang BBPJT merga taun iki bisa ngasilaken 110 judul buku cerita anak. Hang dikarepaken, mugiya ring taun 2024 hang arep teka, bisa ngasilaken maning lan saya akeh. Makene sumber wacanan kanggo anak-anak saya sugih lan bermutu. 

Kepala Balai Bahasa Jatim, Dr. Umi Kulsum, M.Hum ya ngomong gok dibandhingaken ambi taun 2022 hang mung 16 buku, taun iki temenan bisa melesat adoh. "Jumlah ini, sungguh luar biasa," abane.

“Jika tahun ini sudah mampu 110, tahun depan semoga bisa bertambah lagi. Tambah 10, misalnya.” Jare Dr Umi Kulsum, M.Hum nutugaken sambutane.

Balai Riung hotel saya rame lan carem merga sakliyane penulis, ilustator, penelaah, uga diundang pisan Kepala Sekolah SD, Kepala perpustakaan lain undangan liyane.

Ring selan-selane acara, kabeh undangan disuguhi penampilan drama teka lalare SMKN 12 Surabaya. Lalare iki nggawa drama teka salah sijine buku cerita anak hang judhule 'Mancing Iwak, Redite Kurniawan'. Uga ana tampilan pemeragaan teka Komunitas Bisindo (Bahasa Isyarat Indonesia). Uga sing lali, BBPJT muteraken video kompilasi tahapan terjemahan buku cerita anak.

Ring acara iku pisan, BBPJT nduduhaken gok tanggal 10 November sore, tokoh M. Tabrani dinobataken dadi pahlawan nasional merga Tabrani penggagas bahasa persatuan ring Indonesia iki.

Kabeh penulis, ilustrator, penelaah nampa penghargaan ring pungkase acara. Kadhung rika peruh nyang asile buku hang 110, bisa ndulek https://balaibahasajatim.kemdikbud.go.id/2023/10/17/seri-terjemahan-2/

Kadhung ring taun 2023 iki Using mung bisa urun 9 naskah, taun ngarep kudune tambah!

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.