Seleksi Penerjemah Cerita Anak Basa Using 2022
Andi Sep Kurniawan (dipublikasikan pada Minggu, 01 Mei 2022 11:07 WIB)
- Laporan
Balai Bahasa Jawa Timur ring kanal instagrame @balaibahasa.jawatimur nggawe uwar-uwar seleksi penerjemah. Seleksi penerjemah kanggo nerjemahaken karya sastra cerita anak hang nganggo basa dhaerah kayatah Using, Jawa, Medura diuwah ring basa Indonesia. Kegiyatan iki saktemene mula wis dadi agenda taunan ring Balai Bahasa Jawa Timur (BBJT). Mejaji ambi semboyane yaiku "utamakan bahasa Indonesia, lestarikan bahasa daerah dan kuasai bahasa asing."
Ana ring papan pengumuman sarat hang kudu dilengkapi dienggo ndaptar seleksi penerjemah yaiku:
1. Peserta nduwe KTP lan domisiline ana ring Jawa Timur.
2. Peserta dudu ASN ring lingkungan Kementrian Pendidikan lan Kebudayaan, Riset lan Teknologi.
3. Peserta aktip nguwasani basa dhaerah hang ana ring Jawa Timur yaiku Using, Jawa lan Medura.
4. Peserta polah nerjemahaken cerita ring wektu hang wis ditentukaken.
5. Peserta gelem nggawe lan matuhi perjanjian kerja ambi Balai Bahasa Jawa Timur.
Sakdurunge ana seleksi penerjemah cerita anak nganggo basa dhaerah, saktemene Balai Bahasa Jawa Timur wis nganakaken kegiyatan "Bimbingan Teknis Penulisan Sastra Anak Berbahasa Daerah" tanggal 28-31 Maret 2022 ring Hotel Luminor Sidoarjo. Bimbingan Teknis mauka di piloni 25 uwong teka Jawa Timur hang wis lolos seleksi. Aju mari bimtek terus diseleksi dadi 16 besar kanggo diterbitaken. Hang melebu 16 Besar mauka antarane cerita anak teka basa Using akehe 2 judhul, Medura 3 judhul, Jawa 11 judhul.
Mula teka iku, tindhak lanjut kanggo 16 karya cerita anak hang wis diseleksi Balai Bahasa Jawa Timur, iyane mbukak seleksi kanggo penerjemah. Buku hang arep diterjemahaken yaiku asile teka peserta hang wis lolos seleksi. Kawitane anane kegiyatan-kegiyatan iki merga buku wacanan kanggo lare cilik iku sithik, paran maning hang nggango basa dhaerah meh sing ana. Aju Balai Bahasa Jawa Timur karepe nerbitaken cerita dwi bahasa kanggo lalare cilik "Indonesia-Bahasa Daerah" makene buku bacaan kanggo lare ana.
Uwar-uwar seleksi penerjemah bisa rika waca ana ring " https://www.instagram.com/p/Cc-KxokpJZA/?igshid=YmMyMTA2M2Y= ". Ring kono wis ditulis lengkap paran bain hang kudu disiyapaken, kelendi carane ngirim lan kapan wates pungkase. Kadhung wis mari maca aju siyapno berkase lan kirimen ring "https://bit.ly/SeleksiPenerjemah2022 ", mayo bareng-bareng nguri-nguri basa dhaerah tinggalane mbah buyut utamane basa Using.
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
