Tim SMA Taruna Budaya Rogojampi Tampil ring Inggris
Antariksawan Jusuf (dipublikasikan pada Kamis, 03 November 2022 06:48 WIB)
- Laporan
Sakat tanggal 3 sampek 9 Nopember 2022 SMAN Taruna Budaya Rogojampi Banyuwangi diundang Kedutaan Besar RI Inggris kanggo promosi kebudayaan Indonesia hang diwani judhul "Experience Indonesia" ring kutha London.
"Isun lan kanca-kanca guru nyepakaken Tari Jakripah, Rodad Syiiran, Kembang Menur, Jaran Goyang lan Tari Punjari. Tari-tari iku karyane para Maestro tari Banyuwangi yaiku Sahuni, Soemitro Hadi lan Subari Sofyan", jare Pelatih Panjak, Pak Guru Atim hang nalika iku direwangi Kang Sunar Kendhang.
"Experience Indonesia" iku iwuh hang digelar saben taun teka KBRI London minangka wadhah promosi Indonesia hang nduduhaken produk UMKM, kuliner, potensi ekonomi, lan seni budaya. Uga bisa dadi wadhah potensi kerja sama Indonesia-Inggris ring sektor pariwisata, investasi, lan perdagangan.
Ana 12 murid Taruna Budaya Banyuwangi hang arep tampil ring iwuh iku kelebu penari, penabuh gamelan, lan sindhen. Lalare seniman enom iki arep munggah genjot ring sesi Indonesian Day, 6 Nopember lan sesi Indonesian Night, 9 Nopember.
Kanggo nyepakaken apike tampilan, Rebo kepungkur dianakaken latihan ring Disbudpar Banyuwangi, ditunggoni Kepala Dinas Pendidikan, Ratman lan Asisten Administrasi Umum, Ustadi. Nalika iku Ustadi ngewani wekas kadhung tampil ring negara liya iku abot sanggane.
"Hang Rika pikul sing mung akehe macem jugedan. Tapi nggotong arane Banyuwangi, Jawa Timur lan Indonesia. Hang aran promosi seni budaya ya kelendi carane, mari ndeleng Rika njuged aju wong-wong iku kepingin teka ngelencer ring Banyuwangi. Sepisan maning, ayo dijaga arane Indonesia!" wekase.
Kepala Bidang Kebudayaan Disbudpar Banyuwangi, Drs. Dewa Alit, ME ngomong kadhung persiyapane dikurasi ambi Eko Ari B, staf Bidang Kebudayaan Disbudpar. Guru hang ngawal sampek ning Inggris dipercayakaken ning Guru Niluh.
"Tim teka Banyuwangi-Indonesia tampil ping pindho yaiku tanggal 6 lan 9 Nopember 2022," abane Niluh mungkasi gesah.
(Kang Ujik)
Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.
