Petang Penulis Using Diceluk BB Jawa Timur

Nur Holipah (dipublikasikan pada Kamis, 13 April 2023 07:25 WIB)
- Laporan

Balai Bahasa Provinsi Jawa Timur (BBJT) mari nekakaken penulis Cerita Anak hang wis lolos seleksi program Penulisan Cerita Anak Dwibahasa lan diumumaken 24 Maret sabane. Dina Senin, 10 April sore, 85 penulis sak Jatim teka nyang kantor BBPJT hang wis ngalih ring Jalan Gebang Putih 10, Kelurahan Keputih, Sukolilo - Surabaya (sakdurunge ana ring Jalan Siwalanpanji, Sidoarjo) kanggone tandatangan kontrak.

Teka 85 penulis sak Jatim iku, ana 110 judhul Cerita Anak hang bakale didadekaken buku. Merga mula BBPJT sing nguweni wates akehe naskah hang dikirim. Penulis ulih ngirim lebih teka siji. Teka Using dhewek, mung 4 penulis ndhil hang lolos. Drs. Urip Limartono Aris, Nur Aini, Andi Sep Kurniawan lan Nur Holipah. Urip, Aini lan Andi mula tahun 2022 sore wis tau ulih bimbingan teknis, kelendi kudune dadi penulis Cerita Anak iku. Serehne Holip, tahun 2022 sore dadi penerjemah bareng ambi Rayhan Rizki Fadlilah. Weruh aran-aran hang mung iku-iku bain teka Sastra Using, mesthine perlu ana pelatihan kanggo penulis-penulis Using babakan Cerita Anak. Paran maning, iki wis taun kepindho BBPJT iwuh ring Buku Anak. Mesthine teka Using bisa saya akeh timbang taun-taun sak durunge.

Sakat 18 Februari, BBPJT wis mbuka lawang seleksi naskah Cerita Anak sampek pungkasan 10 Maret kelawan syarat husus. Kaya tah: naskah cerita anak kudu ditulis nganggo bahasa Indonesia lan bahasa daerah ring Jawa Timur (Jawa, Madura utawa Using); cerita hang ditulis nganggo salah siji substansi sains, teknologi, teknik, seni lan matematika utawa STEAM (Science, Technology, Engineering, Art, and Mathematics); cerita ditulis husus dikanggokaken Pembaca Awal (B2), lan naskah ditulis nganggo format papan cerita (story board) akehe 19 halaman.

Ring Peraturan Kepala Badan Standar, Kurikulum dan Asesmen Pendidikan (Kemendikbudristek) nomer 030/P/2022 bab Pedoman Perjenjangan Buku dijelentrehaken bab pemadupanan antarane buku ambi sasaran pemaca miloni tahap ‘kemampuan membaca’. Tulisan/cerita kanggo B2, umume maksimal nganggo 9 kata per kalimat, maksimal 7 kalimat per halaman, kandele 24-48 halaman, gambar ilustrasi tiga dimensi (3D), full color, bobot gambar lebih akeh timbang teks, uga sing nganggo balon dialog/balon pikiran.

Iki mula dadi megiyete salah sijine Kelompok Kepakaran dan Layanan Profesional (KKLP) Penerjemahan Balai Bahasa Provinsi Jawa Timur kanggo iwuh nyedhiakaken buku wacanan bermutu. Serehne KKLP ring Balai Bahasa ana pitu antarane yaiku KKLP Perkamusan, KKLP Pembinaan dan Bahasa Hukum, KKLP Penerjemahan, KKLP Perlindungan dan Permodernan, KKLP UKBI, KKLP Literasi lan KKLP BIPA.

Manggon ring Aula M. Tabrani, Dr. Umi Kulsum, M.Hum (Kepala BBPJT) ngucapakaken terima hang gedhi kanggo kabeh penulis hang wis milu ndhaptar seleksi sakdurunge. Mongkog temenan mencirak lan mberejage penulis umur, sakat pelajar sekolahan sampek penulis kawak Sastra ring Jawa Timur. Kabalai uga negesaken dak iki kabeh makene bahasa dhaerah saya moncer, ngagulaken bahasa Indonesia, mesisan ngugem-ugemi bahasa lan budaya Indonesia ring donya njaban hang saya jembar.

Disakseni Dra. Titin Sumarni, kabeh penulis nandatangani berkas perjanjian kontrak. Mariki 85 penulis iki arepe diundang ring Penelaahan. Kira-kira ulan Mei ngarep, 85 penulis iki arep diundang maning kanggo Lokakarya ring Batu – Malang. Mugi-mugi kabeh hang wis dikarepaken BBPJT bisa lancar tanpa alangan, sampek 110 judhul cerita anak kawujud buku terbit lan gadug nyang tangan-tangane pemacane.

Redaktur menerima berbagai tulisan, kirimkan tulisan anda dengan mendaftar sebagai kontributor di sini. Mari ikut membangun basa Using dan Belambangan.